Amdanom ni

Eirian Lloyd Jones ydw i, awdures rhaglen Tric a Chlic. Cefais fy ngeni a’m magu ym Mwlch y Llan, pentref yng Ngheredigion. Dechreuais fy ngyrfa nôl yn fy milltir sgwâr fel Pennaeth Adran Anghenion Dysgu Ychwanegol yn Ysgol Uwchradd Tregaron. Wedi treulio tair blynedd ar ddeg yno, symudais i Dde Cymru gan weithio yn Awdurdod Addysg Gwent i ddechrau a Thorfaen wedi ad-drefnu llywodraeth leol. Fy mhrif swyddogaeth oedd fel Athrawes Fro Ymgynghorol Cymraeg Mamiaith ond cefais gyfle i gyfrannu hefyd i nifer o bwyllgorau a grwpiau ffocws a bûm yn hyfforddi yn genedlaethol o dan adain CBAC ynghyd â chreu deunyddiau i wahanol sefydliadau megis Adran Addysg y BBC.

Yn ystod y cyfnod hwn cefais gyfle i fynychu nifer o gyrsiau a chynadleddau yn benodol ar ddulliau addysgu darllen gan addasu nifer o gynlluniau i’r Gymraeg. Wedi ymddeol yn rhannol, tynnais ar y profiadau hyn i greu rhaglen “Tric a Chlic” a bu cyhoeddi’r rhaglen yn fodd imi wireddu un uchelgais gan fy mod yn grediniol mai’r dull mwyaf effeithiol o addysgu darllen cynnar yw trwy gyfrwng ffoneg synthetig.